Handbók aðstoðarfólks - veikindi og tryggingar

Veikindaréttur aðstoðarfólks

‍Aðstoðarfólk nýtur veikindaréttar í sínu starfi eins og aðrir. Veikindarétturinn á fyrsta ári í starfi nemur tveimur dögum fyrir hvern unnin mánuð. Aðstoðarfólk getur þannig unnið sér inn 24 daga veikindarétt á fyrsta starfsári. Veikindaréttur er ekki það sama og frítökuréttur. Veikindaréttur safnast upp á milli mánaða og skal vera notaður vegna raunverulegra veikinda. Ef veikindaréttur klárast átt þú ekki tilkall til launa í veikindum.

Eftir eitt ár samfellt ár í starfi breytist veikindarétturinn. Þá nemur hann einum mánuði á svokölluðum staðgengilslaunum. Staðgengilslaun eru laun sem aðstoðarmanneskja hefði sannanlega verið með ef viðkomandi hefði ekki verið veikur, þ.e. öll vaktaálög, bónusar o.fl.

Eftir tvö ár í starfi bætist við einn viðbótarmánuður á dagvinnulaunum, samtals tveggja mánaða veikindaréttur.

Eftir þriggja ára samfellt starf bætist annar mánuður við á dagvinnulaunum og verður því einn mánuður á staðgengilslaunum og tveir mánuðir á dagvinnulaunum, samtals þrír mánuðir í veikindarétt.

Eftir fimm ára samfellt starf verður veikindarétturinn einn mánuður með staðgengilslaunum, einn mánuður með dagvinnukaupi (föst laun fyrir dagvinnu, auk vaktaálags o.fl. miðað við 7.2 klst. á dag eða 36 klst. á viku miðað við fullt starf) og tveir mánuðir á dagvinnulaunum, eða samtals fjórir mánuðir í veikindarétt.

· Fyrstu 12 mánuðir: Tveir dagar fyrir hvern unnin mánuð. Safnast upp og geta orðið allt að 24 yfir árið.

· Eftir 1 ár í samfelldu starfi: Einn mánuður á staðgengilslaunum.

· Tveggja ára samfellt starf: Einn mánuður á staðgengilslaunum og einn mánuður á dagvinnulaunum.

· Þriggja ára samfellt starf: Einn mánuður á staðgengilslaunum og tveir mánuðir á dagvinnulaunum.

· Fimm ára samfellt starf: Einn mánuður á staðgengilslaunum, einn mánuður á dagvinnukaupi og tveir mánuðir á dagvinnulaunum.

Veikindarétturinn miðast ávallt við síðustu 12 mánuði í starfi.

Slasist aðstoðarfólk í starfi nýtur hann/hún/hán sjálfstæðs réttar til að halda dagvinnulaunum sínum í þrjá mánuði, en sá réttur gengur ekki á venjulegan veikindarétt. Sjá meira um skilyrði þess að slys teljist til vinnuslyss í kaflanum VINNUSLYS.

Hvað ef veikindarétturinn klárast?

Aðstoðarfólk sem klárar sinn veikindarétt hjá NPA miðstöðinni getur sótt um sjúkradagpeninga frá sínu stéttarfélagi. Við þessar aðstæður getur þú leitað til NPA miðstöðvarinnar og fengið uppáskrifað vottorð um hvenær veikindarétturinn kláraðist.

Veikindi barna

Foreldri er heimilt að verja tveimur dögum fyrir hvern unnin mánuð heima fyrir til að sinna veiku barni sínu fyrstu sex mánuði í starfi. Eftir það verða dagarnir 12 á hverju 12 mánaða tímabili.

Réttur þessi fellur því undir aðstoðarfólk sem er með börn á framfæri undir 13 ára aldri.

Aðstoðarfólk verður að láta vita með sama hætti og þegar viðkomandi tilkynnir um sín eigin veikindi.

Læknisvottorð

Ef aðstoðarfólk er veikt í meira en fjóra almanaksdaga er æskilegt að viðkomandi skili inn læknisvottorði. Þú sendir þá læknisvottorðið til verkstjórnanda sem síðan kemur vottorðinu til NPA miðstöðvarinnar sem heldur utan um veikindaréttinn. Þú verður að láta verkstjórnanda vita hve lengi læknisvottorðið gildir. Það er æskilegt að verkstjórnandi þinn verði í sambandi við þig reglulega ef um langtímaveikindi er að ræða, til að athuga hvenær er von á þér aftur í vinnu, hvort að þú óskir eftir framlengingu á veikindaleyfi eða hvort að þú gerir ráð fyrir því að fara í fleiri læknisheimsóknir eða aðrar meðferðir á næstunni.

Æskilegt er aðstoðarfólk tilkynni veikindi, áframhaldandi veikindi eða endurkomu til vinnu eftir veikindi. Það er almennt talið góð venja og stuðlar að skýrum samskiptum og skilvirkari skipulagi á vinnustað.

Verkstjórnandi getur einnig óskað eftir læknisvottorði vegna tíðra veikinda aðstoðarfólks, óháð því hversu löng eða stutt veikindin eru. Aðstoðarfólk þarf þá að útvega vottorð í hvert skipti sem það meldar sig inn sem veikt.

Slys á vinnutíma

Slys á vinnutíma eru þau óhöpp sem eiga sér stað í beinni framkvæmd vinnu. Slys falla því ekki undir vinnuslys ef þau eru ekki í neinum tengslum við vinnuna eða við framkvæmd hennar. Einnig eru slys sem eru tilkomin vegna ásetnings eða annarrar háttsemi aðstoðarfólks ekki talin sem vinnuslys.

Ef viðkomandi slasast í frítíma sínum, líkt og í matartíma eða annað slíkt þá telst óhappið ekki sem vinnuslys.

Ef viðkomandi lendir í árekstri á beinni leið í vinnu eða heim frá vinnu, getur það talist sem vinnuslys. Bein leið heim skiptir þó sköpum hér, því ef óþarfa stopp eiga sér stað á leiðinni er slysið ekki lengur talið sem vinnuslys.